Et war 1884, wéi op dem Knuedler de Wëllem II säi Monument opgeriicht ginn ass, an zou Hënsdref de Bernard Dostert, säin Atelier ugefaangen huet.
Schonns 3 Generatioune virdru war et ëmmer e Wooner oder e Schmatt, de père en fils an der Famill Dostert, awer dunn 1884 ass en Atelier an d‘Liewe geruff ginn, deen et och haut nach ëmmer gëtt.
Et war keng einfach Zeit, ausser am Minett ass et an deene Beruffer kaum Aarbecht gi fir en eenzelnen Schmatt.
De Bernard Dostert huet och virdrun op der Arbed geschafft, an huet esou den Emile Mayrisch kannt.
Hien hat du schonns Iddien‚ wei een d‘Héichiewe misst verbesseren, an huet en oppent Ouer beim Emile Mayrisch fonnt. Stole Bandagen, a stole Reng sollen em di gemauert Héichiewen geluecht ginn, fir dat et manner Problemer géife ginn bei der éischter A-betriebnahm, vun esou engen Uewen. Et si ganz daachs Implosiounen oder Explosioune ginn mat deels schwéieren Accidenter.
Encouragéiert vum Emile Mayrisch, huet hien dëser Bandagë hiergestallt an déi Léisung ass nach bis zum zweeten Weltkrich, Stand vun der Technik bliwwen. Nom Krich si Héichiewen lues a lues net mei aus Steng gemauert ginn, mee aus stolen Placken zesummegeschweesst ginn. Dunn war 1958 Schluss mat dësen Bandagen, an déi läscht, sinn zou Mons an der Belsch agebaut ginn.
1925 ass de Bernard Dostert zou Hënsdref gestuerwen, a säin Fils Franz Dostert, dee säit Ufank vum 20-ten Joerhonnert am Betrib matgeschafft huet, huet d‘Relève geholl.
Hien war 1874 gebuer a war vun 1912 bis 1920 Buergermeeschter vun der
Gemeng Luerenzweiler.
Hien huet de Betrib duerch den éischten Weltkrich bruecht an duerno och d‘Rezessioun matgemaach. Mee opginn ass et bei den Dostert’en ni ginn.
Hien huet all méiglech Saache produzéiert an un de Mann bruecht. An den 30-er Jore sinn déi éischt Camionen op de Maart komm, an et si Kipperen gebraucht ginn an der Bauwirtschaft. Déi éischt ware mat Crémaillairen an Handkiirpen ausgerüst fir de Kipper an d‘ Luucht ze bréngen. 1936 huet hien dunn déi éischt Hydraulikpompelen, Zylindern a Kippchâssien entwéckelt a gebaut. D‘ Kipperkëschten sinn dono bei engem Carrossier opgebaut ginn, wéi deemools och d‘ Kabinn vum Camion.
Mee dobäi ass et net bliwwen. 1938 huet hien e Müllwoon gebaut, deen hydraulesch no vir kippe konnt, fir hannen erëm Plaz ze maache fir nozelueden.
Am Krich war dëse Müllwoon zerluecht a verstoppt ginn, an ass nom Krich erëm zesummegebaut ginn an als éischte Müllwoon vun der Staat Lëtzebuerg an den Asaz komm.
Aus dëser Zäit ass d’Foto.
1945 ass de Franz Dostert gestuerwen, a säi Fils Paul Dostert, huet de Betrib weider gefouert. Dreckskëschte vun alle Gréisste sinn aus Blech gemaach gi fir bal all Gemengen am Land, dëst a bis zou 25.000 Stéck z.B. fir d‘Stad Esch.
Di Eemere sinn an 3 Schichten zou Hënsdref gestanzt an zesummegeschweesst ginn. Galvaniséiert sinn se bei der Firma Brucker zou Waarken ginn, e Betrib deen et haut och nach gëtt.
Et sinn awer och landwirtschaftlech Maschinne gebaut gi wei z.B. eng Maschinn fir d‘Gromperen erauszehuele.
Vun virum Krich un, an och duerno sinn och all méiglech Himmer, Meesselen a Geschier fir all méiglech Uwendunge geschmied an och bis weit an d‘ Belsch kommerzialiséiert ginn.
Vun 1951 u sinn och verschidde Pompiers Ween equipéiert ginn, wouvunner der 3 an de belsche Kongo gaange sinn, haut steet nach een beim Pompjeescorps vun Nidderaanwen.
Seelwannen fir an d‘Wéngerten a fir den Holz Transport waren och am Programm, mee no anno sinn ëmmer mei Kipperen an der Rekonstruktioun gebraucht ginn a bis 1965 war den Ateliers Dostert deen eenzegen dee Kipper zou Lëtzebuerg gebaut huet. Lues a lues ass Konkurrenz opkomm a wann dat geschitt, dann däerf een net kloen, mee sech ëmkucke fir nei an aner Produkter ze bauen an ze vermaarten.
An de 50-er Joren waren dat an engem éischten Schratt Unhänger mat Kipper vun der Firma Seibel vun Hanau aus Däitschland. D’Kipper goufen mat Pressloft an d‘Luucht gekippt. Dat goung awer nëmmen no riets oder lenks op d‘Säit. Trotzdeem sinn der e puer zou Lëtzebuerg verkaaft ginn.
Duerno sinn déi éischt Kranen op Camionen op de Maart komm. Am Ufank sinn déi vun der Firma TEHA vun Düsseldorf komm, awer déi hunn 1971 opgehalen mat der Produktioun. 1970 war de Fränz Dostert bei TEHA zou Düsseldorf matt 17 Joer an engem Stage vun 10 Méint, fir no engem weidere Stage vun engem Joer zou Hënsdref weider an Däitschland ze goe fir Maschinnebau ze studéieren.
1974 am Januar huet hien do säin Ofschloss gemaach an huet schonns e Mount méi spéit den Betrib zou Hënsdref geleet, well säin Monni Paul schwéier onheelbar krank ginn war an net méi an den Betrib goen konnt.
No TEHA si Krane vun der Mark HAP verkaf, mee d‘Qualitéit huet net gestemmt, an no engem gudde Joer war dat eriwwer.
Am Summer 1974 huet dunn d‘Firma PALFINGER Kontakt mat Ateliers Dostert kritt an dat war glécklechen Zoufall fir déi 2 Firmaen.
Am November 1974 huet de Fränz Dostert sech mat dem Här Palfinger getraff a vun do un ass et ferm biergop gaange mat Kranen zou Lëtzebuerg.
1976 ass de Paul Dostert du gestuerwen, hien hat keng Kanner an de Fränz huet mat 23 Joer de Betrib missten eleng weiderfeieren.
An engem Zäitraum vun 13 Méint ass dann de Ferd Dostert an de Willy Colbert, eise laangjärege Comptabel gestuerwen. 3 Mataarbechter déi iwwert 30 Joer am Betrib ware sinn do och an hier wuelverdéngten Pensioun gaangen.
Dat war net einfach fir de Fränz an e Spronk an d‘ kaalt Waasser. Deemools ware 12 Mann am Betrib.
Awer och d‘Zäite waren net einfach: Uelegkris 1973-74 war schlëmm, et sinn autofräi Sonndeger agefouert ginn. Di 2-t Uelegkris koum dunn 1979. D’Energiepräisser sinn extrem geklommen. Eng Stolkris, war d‘ Suite vun den Uelegkrisen an et war d‘ Zeit vun der Revolutioun am Iran. All dëst huet d‘Bauwirtschaft och zou Lëtzebuerg betraff an domadden och de Kipperbau, e wesentlecht Standbee vun eisem Betrib déi Zeit. Also huet Ateliers Dostert sech ëmgestallt, manner Kipper a mei nei an aner Produkter verkaaf. Containersystemer op Camionen a Plaz vun de Kipper an zousätzlech e Kran um Camion hunn de Bau wesentlech rationaliséiert an do waren se dunn derbäi.
1976 hunn si och d’Vertriedung vun Guima Containersystemer iwwerholl.
Ateliers Dostert huet ugefaange mat aneren Firmaen zou Lëtzebuerg mei zesummenzeschaffen, esou goufen Deeler fir d‘Usine de Wecker hiergestallt, a mat den Ateliers Georges vum Houwald hunn se déi éischt Plasmanitreieranlagen gebaut.
Datt déi 2ten Anlage direkt a Kanada geliwwert ginn ass, an haut nach ëmmer funktionéiert weist drop hin dat, daat de richtege Wee war. An de Joren no 1983, huet Ateliers Dostert dunn op der Hannover Messe ausgestallt, ganz bescheiden awer mat Succès. Bis haut schaffen se nach matt der Firma Rübig vu Wels an Éisträich zesummen, déi se do kenne geleiert hunn. Si liwweren Komponenten fir de Secteur vum Traitement de surface duerch Plasmanitruration, déi duerch d’Firma Rübig weltwäit verkaaft ginn. Haut des Daachs fënnt en des Anlagen an Deeler, an der ganzer Welt, op dat Alaska, Australien, China, Süd-Korea, Japan, Amerika, Europa, Indien, Südamerika oder soss eng Plaz op der Welt, iwwerall gëtt et Anlage mat Komponenten vun Ateliers Dostert.
Si hunn och Monte-chargen a Monte-poubelles gebaut, ëmmer do wou kee Standard gepasst huet.
Hir Comptabilitéit hunn se ëmmer selwer gemaach, a gudder Zesummenaarbecht mam Jean Dostert, dem Fränz sengem Papp dee Steierinspecter war, an der Mutualité d‘aides aux artisans, bis dann dem Fränz säin Brudder Ernest, och Tim genannt, 1985 an de Betrib erakomm ass. Zesummenhunn déi 2 dunn d‘Parte vun deenen aneren Associéen lues a lues opkaaft a bis zum Tim sengem fill ze freien Doud 2008 de Betrib weidergefouert.
Et ass op der Oeko-foire ausgestallt gi well och d‘Ëmwelt dem Ateliers Dostert uewe léit. Säit der Zäit befeelen se Hydraulikanlagen op Wonsch vun de Clientë mat biologesch ofbaubarem Ueleg vu PANOLIN woumadden se ganz gutt Resultater hunn. Vollsyntheteschen Ueleg, biologesch ofbaubar an deen net altert, erlaabt de Clientë ouni Vidangë auszekommen. Dëst ass haut bei de Kranen zou engem Standard ginn. Et huet awer Jore gedauert fir d‘Clienten dovun ze iwwerzeegen.
2001 hu Sie mat der Firma Wiedemann aus Bayern ugefaang ze schaffen, a verkafen a maachen de Service vun de Kanalspullween. Kanalspullween matt Waasser Recycling, eng Erfindung vum Karl Wiedemann déi et erlaabt, Kanäl ze botzen ouni Drénkwaasser ze benotzen. Des Camionen si bei villen Firmen a Verwaltungen hei am Land am Asaz. Hei gëtt den Ëmwelt Gedanken, héich gehal. Sie maachen och den Entretien vun Wiedemann Equipementer an der Belsch an a Frankräich.
De Prix de l‘innovatioun vun der Handwierkerkammer huet se motivéiert ëmmer erëm nei Weeër ze goen an esou hunn se matgemaach a bis haut 4x an d‘ Finall komm an e Präis kritt. 2006 hunn se fir d’éischt matgemaach mat engem mobille Préifstand fir Camionen, den haut nach am Asaz ass, an domadder den éischten Präis gewonnen.
2010 mat enger Ankerweckelmaschinn fir Leroy-Somer, fir 40 Tonnen schwéier Rotoren ze wéckelen.
2013 e Weisystem op Camionen, fir Container um Camion ze weien, dann doduerch de Camion net ze iwwerlueden
A Schlussendlech 2017 Passerelle fir um Daach vun den Elektresche Bussen a Sécherheet schaffen ze kennen. Do komme mer nach drop zeréck.
2010 war dunn en entscheede Joer fir d‘ Weiderbestoe vun den Ateliers Dostert. D‘Situatioun war, dat de Fränz Dostert zwar 100% vun den Undeeler a senger Hand gehal huet, mee Een eleng kann esou e Betrib net weiderfeieren.
De Charel war schonns säit 2003 fest am Betrib, nodeems hie Stagë bei Palfinger an Éisträich a Schottland, der Schwäiz an a Frankräich gemaach hat. De Jacques Muller, de vun 2003 bis 2007 schonns bei Ateliers Dostert war ass 2010 definitiv bei Ateliers Dostert komm an zwar als vollwäertege Partner mat engem Drëttel vun de Parten, och de Charel huet dunn een Drëttel vun de Parten iwwerholl.
Di 3 Häre feiere säitdeem de Betrib .
